المرأة لما بتحب راجل بجد ما بتتقدمش بالسن وإنما بتنضج وبتبقى أكتر جمالًا وإشراقا من قبل وده سر بقاء المرأة وقوتها فهي بتوفر طاقتها للعناية بنفسها وعافيتها عشان حبيبها، وعشان تكون أجمل وأفضل في كل مرحلة عمرية في حياتها، فهي بتحب المدح والاهتمام وكلمات الغزل والحب لأن ده بيخليها متكبرش ويفضل ده هو مصدر جمالها للأبد…
المرأة بتحب الراجل اللى يهتم بيها ويقدرها، أفضل من اللى يديها اللى فى جيبه ويهملها، الراجل اللى يحترمها ويسمعها كلام حلو، مش اللى يقل منها، الراجل اللى يخاف على زعلها ويراعي خاطرها، مش يقسى عليها ويكسر بخاطرها، اللى يغير عليها بس ميتحكمش فيها، هو الجدار اللى تستخبى وراه وهى واثقة إنه مش هيسقط عليها ومش هيأذيها مهما حصل، هو المراية الصافية اللى تشوف من خلاله وجهها الحقيقى اللى متعرفوش، اللى يكون فخور بيها وبأنها جزء من حياته..
المرأة بتحب الراجل اللى تتدفى بحنانه، فتكون مكمله ليه مش تابعه، مش أقوى من شخصيتها، ولا أقل من كرامتها، يقول أحمد خالد توفيق: “إن المرأة تحب رجلها، ليس لأنه أقوى الرجال، ولا أوسمهم، ولا أغناهم، بل لأنه هو بضعفه وقوته، والحب ليس استعراض قوة .. لكنه طاقة عطاء دافئة مستمرة” ..
الراجل اللى بتحبه المرأة هو اللى هين فى كلامه، رقيق فى مشاعره، شهم فى أفعاله، رجوله فى مواقفه، اللى يواجه الرجال ولا يستقوى على النساء، من يكفر بكل النساء ويعتنقها وحدها، اللي لما يتكلم تنبهر من أسلوبه وما تملش من حديثه، اللى كلامه منطقي يلفت انتباهها، اللي يسمعلها ويقدر رأيها، الراجل الجرئ المنطلق، اللى ياخدها معاه لعوالم جديدة، وتجارب مثيرة، الراجل الكريم مش بس بفلوسه وهداياه، لا ده كريم بعواطفه، وحنانه وطيبة قلبة، اللى يقدر يكوّن ذكريات جواها متتنسيش..
الراجل اللي يتقى الله فيها وياخد بإيدها للجنة، الراجل الواثق في نفسه الصادق في كلامه، القوي في الحق وفي إنكار الباطل، المتكبر على توافه الأمور، المتواضع للنصيحة، البار بوالديه الرحيم بالمؤمنين..
الراجل اللي يبكي عليها مش اللي يبكيها، اللي يشكرها ولو بكلمة بسيطة، اللي يكون راجل ليها مش عليها، اللي تحس أنها مالية عينيه مش اللي بتعجبه أي أنثى، اللي يمدح فيها ويحسسها بأنوثتها مش اللي ينتقد تفاصيلها من غير ما يراعى مشاعرها، اللي شايفها كاملة، مش اللي عايزها كاملة وكل النقص فيه!! ..
وفى النهاية أحب أوصل رسالة لكل راجل محترم : “ليست كل امرأة يمكن استبدالها بأخرى، هناك امرأة لو ضاعت منك وفرطت بها فلن تجد من يشبهها، سوف تمضي بقية حياتك تجمع بقايا صورتها من ألف امرأة أخرى، ولكنك لن تتمكن من جمعها لتعوض غيابها.”
