بنت سوهاج “شيماء حمدي” صاحبة براند ميريت آمون ستور .. قصة نجاح وتحدي

متابعة / محمد مهران

على اسم أجمل أميرات الفراعنة، اختارت الصعيدية بنت سوهاج – شيماء حمدي- اسم البراند الخاص بيها لتصميمات العرايس والسجاجيد بالكروشيه والإيموجرامي، ولأنها مرتبطة بأصولها جدًا فاختارت اسم الأميرة الفرعونية “ميريت آمون” واللى تمثالها موجود في أخميم بسوهاج، ويعتبر أجمل تمثال لامرأة في العالم.

قصة “شيماء” هي قصة نجاح وتحدي لأنها بدأت تشتغل الكروشيه اللي اتعلمته من جدتها وزوجة عمها وهي عندها تسع سنين، وفضلت أكتر من 15 سنة بتشتغله كهواية لأن أهلها كانوا رافضين تمامًا إنها تبيع منتجاتها أو تبقى دي شغلتها، لكن مع إصرار كبير من “شيماء” بدأت مشروعها من خمس سنين وبدأته بتدريب بنات تانية على الكروشيه وبيع وتسويق منتجاتهم.

في البداية كان شغل “شيماء” على الكروشيه التراثي التقليدي في الصعيد زي طواقي المزارعين والصعايدة، ومع الوقت قدرت عن طريق الإنترنت إنها تطور شغلها وتعمل عرايس إيموجرامي ودباديب وسجاجيد كاملة معمولة يدوي.

 ولأن طموحها وشغفها ملوش حدود شيماء بتحلم إنها تعمل تدريبات للمكفوفين على شغل الكروشية لأنه بقى في خيوط وإبر كبيرة تقدر تخليهم يشتغلوه باللمس وبسهولة.