شقيقة السقا ترد بقسوة .. بعد تلميح مها أحمد لأحمد السقا وأمير كرارة ووصفهما بـ«الندل» و«الكومبارس»

هجوم حاد شَنّته الفنانة مها أحمد على زميلين لها بالوسط الفني – لم تسمهما – وَجّهت من خلاله رسالة شديدة اللهجة، مُوَضِّحة أنّها تعرّضت لمواقف محرجة منهما، مُشَبِّهة أحدهما بـ«الندل»، مشيرة إلى أنّ هذين الفنانين شاركا سوياً بمسلسل تمّ عرضه خلال شهر رمضان 2021.

الهجوم الشرس الذي أطلقته الفنانة مها أحمد، كان عبر منشور لها عبر حسابها الرسمي على «فيسبوك»، بدأت عبره سرد تفاصيل ما حدث معها وفضح هذين الفنانين، قائلة: «نجمان عملا مسلسلاً و(اتنجمت) عليهم بنوتة لسه ألف باء تمثيل».

وأضافت «مها أحمد» عبر صفحتها الرسمية: «عوضي على الله دي الجملة اللي دايما بقولها لما اتصدم في أشخاص.. الحكاية يا سادة أن نجمين عملا مسلسلاً و(اتنجمت) عليهم بنوتة لسه ألف باء تمثيل إلى أن أصبحت بطلة المسلسل وبطلة الدعاية للمسلسل وهما راضيين، رغم إن طول عمرهم مبيعملوش كده مع أي زميلة لهم أقربها أنا».

واستكملت مها أحمد هجومها على هذين النجمين دون ذكر اسميهما، حيث وصفت الفنان الأول بـ«الندل»: «النجم الأولاني بيني وبينه عيش وملح وزمالة.. رشحت في مسلسل بطولته، وكان بيقنعني بدور، ولما وافقت بعتولي دور تاني معرفوش.. دور متعملوش واحدة مبتدئة، المفروض إنه عارف قيمتي الفنية، وعارف إني إضافة له.. اتهرب مني وموقفش جنبي وباعني، رغم إن الكل عارف إني زي أخته (ندل)».

وواصلت مها أحمد هجومها: «أما التاني كان في بداياته يتمنى يسلم عليّ ويقولي يا أستاذة، نزلت من نفسي وقلتله مش هنشتغل مع بعض.. ما هي الحوجة مُرّة .. رد وقالي الدور بينادي صاحبه.. طبعاً محكلكوش قد إيه ندمت نفسي وعشت أسود أيام حياتي عياط واكتئاب وقلت عوضي عليك يا رب».

واستكملت مها في فضح طبائع الأشخاص، واستغلال حاجة الناس، قائلة: «تمر الأيام والاتنان يعلوان ويتجمعان مع بعض في مسلسل واحد (على عينهم طبعاً) ويمثلوا وحش قوي تمثيل الكفار، وطلعوا كمان مبيقروش اللي بيمثلوه، وربنا يركب عليهم بنوتة سنة أولى تمثيل وخبرة ويتحول المسلسل والدعاية والدراما كاملة لصالحها وهما (مخدماتية للأستاذة)».

واختتمت مها أحمد هجومها: «يمهل ولا يهمل… ابدوا من جديد يا أوفر تمثيل يا اللي مبتقروش يا كمبارس جنب النجمة. نصيحة بلاش تتشطروا على اللي كان بينكم وبينهم عيش وملح.

بلاش تتشطروا على أساتذتكم (عوضنا على الله). يا رب متحوجنا لحد حتى ولو كان أقرب الناس لينا».

شقيقة السقا ترد على منشور وتلميح مها أحمد للسقا وكرارة

وفي أول رد فعل لمنشور مها أحمد، هاجمت فاطمة السقا، شقيقة الفنان أحمد السقا، الفنانة مها أحمد، بعد تلميحها عنه والفنان أمير كرارة بأنهما قبلا الإساءة لنفسيهما رضوخًا للمخرج محمد سامي، من أجل مي عمر، زوجة المخرج في مسلسل «نسل الأغراب».

وكتبت «فاطمة»، عبر حسابها الرسمي على موقع «فيسبوك»، موجهة حديثها إلى مها أحمد: «الكلام ده موجه ليكي يا أستاذة بدل ما تفضلي تمسحي ردي كل شوية ..أبهرتيني يا مها بأخلاقك العالية.. وبانك افتكرتي العيش والملح اللي كلتيه في البيت بتاع الفنان اللي مش عارفة تقولي اسمه بس عرفتي تقولي عليه (ندل)، اللي هو أحمد السقا.. بس أنا بقولك قدام الناس قطع لسان أي حد يقول عليه كده لأنه راجل أكرمك ووقف جنبك انتي ومجدي بدل المرة ألف».

وأضافت فاطمة: «أمير كرارة برضه راجل جدع ومحترم للي ما يعرفهوش في البوست بتاعك ده.. معرفش ايه الفرص اللي كانت عندك اللي كان يتمنى يشتغل معاكي فيها زمان بس هو أي حد يتمنى يشتغل معاه دلوقتي أكيد.. وكلمة الدور بينادي صاحبه دي بتاعة افلام ..ما بتتقالش في الحقيقة.. كفايا دراما وتشويه للناس».

وتابعت شقيقة السقا في ردها على مها أحمد :«وبعدين هما كممثلين مش مطالبين يقفوا جنبك ولا يجيبولك أدوار على فكرة.. دى رؤية مخرج وناس بتوع كاستنج.. الحقيقة أنا مش عارفة انتى عايزة ايه ..انا مش شايفة بعد العشرة الطويلة اللى انتى قولتى عليها غير كمية الحقد والسواد والشماتة اللى كانوا متداريين ورا ابتسامة كدابة معرفش انتى ازاى كنتى بتدخلى بيوتنا الصراحة وانتى ست وحشة كده».

واختتمت: «نسيت أقولك.. السب والتطاول ده بيدل على الأصل.. واحنا بقى ولاد ناس مع اننا عندنا كلام كتير اوى يتقال».