مقالات

مروة حسين تكتب.. “القواعد العشرة لروقان دماغك”

 

القاعدة الأولى :

عشان تعيش مرتاح البال عليك انك تفكك من الناس اللي دايما بيشتكولك حياتهم خليك معاهم كده بس من بعيد لبعيد لأن حياتك اكيد فيها اللي مكفيها وانت مش ناقص

القاعدة التانيه : 

أي حد يقلل منك بصله وامشي وانت بتضحك عشان يفهم إن كلامه معاك كان غلط وهيحس انه هو اللي قليل  ” معلش يعنى انت بردك شخص محترم وليك قيمتك ” أل يقل منك أل “

القاعدة التالته :

الهدوء ثم الهدوء لو حد ضايقك اوى حاول تكون هادي عشان أولا تعرف ترد عليه بدون غلط فيتكسف على دمه ويتحرج وعشان كمان تحس انك اخدت حقك وانت معلم عليه ” اه انت مش قليل برضه “

القاعدة الرابعة :

اوووعي تعيش حياتك وانت تبقي مجبر على علاقه بتضايقك  حتى لو فيها روحك عشان متبقاش زعلان طول الوقت لا شيل العلاقه من دى حياتك

 زي مابتشيل خاتم من صباعك  كان مسببلك وجع على طول وسلامة صباعك الف سلامه ابئا حطله كيناكومب عشان مايفئفئش

القاعدة الخامسة :

وهى مش قاعده ده قانون تمشي بيه في حياتك وهو أنك تبقي متأكد ان ضحكتك بالدنيا

حد زعلك حد ضايقك دور على أي حاجه تضحك واضحك من قلبك وارمي ورا ضهرك

 المفكر والكاتب مصطفي محمود كان دايما يقول ” الضحكة وان كانت مجروحة فإنها تفك ضائقة الروح ” ويخربيت اللي يزعلك ياسيدي

القاعدة السادسة :

ما تتقيدش بشيء انت مش مجبر عليه الكتاب اللي مش عاجبك متقراهوش الأكلة اللي مش عاجباك متاكولهاش النصيحة اللي اتقالتلك وانت مش مقتنع بيها مقتنعتش بيها عادي اكيد فيه نصايح تانيه.. متبقاش عامل زي الكرسي اللي بيتحط عليه الغسيل وبيشيل حاجات مش بتعته

ثم انت مش كرسي اصلا  ! ولا هو أي حد يقولك انت كرسي تبقي كرسي ..ها ؟!

القاعدة السابعة :

احنا كده خلصنا واتمني انك تطبق كل القواعد اللي قولتها فوق

القاعدة التامنه :

 ابقي طمنا عليك وقولنا عملت ايه

القاعدة التاسعة :

متنساش تطمنا عليك وتقولنا عملت ايه

القاعدة العاشرة :

لا ده فضى وفراغ.. مفيش حاجه ممكن تخرج من المقال عادى ..آه أوعى تنسى تطمنا عليك وقولنا انت عملت ايه ؟!

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
%d مدونون معجبون بهذه: